Ajeeb Saaneha Mujh Par Guzar Gaya Yaaro
Ajeeb saaneha mujh par guzar gaya yaaro,
main apne saaye se kal raat dar gaya yaaro.
Har ek naqsh tamanna ka ho gaya dhundhla,
har ek zakhm mere dil ka bhar gaya yaaro.
Bhatak rahi thi jo kashti woh gharq-e-aab hui,
chadha hua tha jo dariya utar gaya yaaro.
Woh kaun tha woh kahan ka tha kya hua tha usey
suna hai aaj koi shakhs mar gaya yaaro.
Main jis ko likhne ke armaan mein jiya ab tak,
waraq waraq woh fasana bikhar gaya yaaro. !!
